Inhaltsbereich

Nivels da privel da vias glischas

Vias glischas resultan en cumbinaziun da fradaglia e d'umiditad.

ls avertiments per vias glischas sa refereschan cunzunt al stadi da las vias. Differenziads vegnan ils suandants privels:

  • vias glischas da naiv: naiv schelada sin las vias (tar quantitads fin 4 cm).
  • vias glischas da glatsch: vias bletschas che schelan la notg en cas da tschiel serain.
  • glatsch viv: precipitaziuns fraidas u sfradentadas (plievgia u pluschignadas che sa transfurman en glatsch) crodan sin ina via sfradentada (surfatscha pli fraida che 0 grads) e schelan immediatamain.

Da resguardar: Per territoris sur 800 meters sur mar na vegnan publitgads nagins avertiments da vias glischas da glatsch u da naiv.

Nivel 1 da privel (pitschen privel u nagin privel)

Avertiments da vias glischas vegnan publitgads mo per ils nivels 2 fin 4, perquai ch'i n'è betg pussaivel da far ina differenziaziun tar quantitads da precipitaziuns pli grondas.

Nivel da privel 2 (privel moderà)

Consequenzas

Localmain u lunsch enturn privel da glischnar.

Cumportament

Infurmaziuns davart il cumportament chattais Vus en las Recumandaziuns da cumportament durant vias glischas

Descripziun da las valurs da mesiraziun e da prognosa

  • Vias glischas da naiv (main che 4 cm, temperatura da la via < 0 grads).
  • Vias glischas da glatsch (l'umiditad sin via schela).
  • Glatsch viv (la plievgia sa transfurma en glatsch).

Nivel da privel 3 (privel considerabel)

Consequenzas

  • Privel da glischnar andetg ed acut.
  • Vias da traffic schelan fin ch'ellas n'èn betg pli transiblas.
  • Il traffic aviatic vegn impedì.
  • Roms rumpan giu sut la chargia dal glatsch.

Cumportament

Infurmaziuns davart il cumportament chattais Vus en las Recumandaziuns da cumportament durant vias glischas

Descripziun da las valurs da mesiraziun e da prognosa

Plievgia che sa transfurma en glatsch: fin 2 mm.

Nivel da privel 4 (grond privel)

Consequenzas

  • Privel da glischnar andetg ed acut.
  • Il traffic sin via ed il traffic aviatic vegnan interruts cumplettamain.
  • Il traffic da viafier vegn impedì.
  • Roms rumpan giu u bostga cupitga sut la chargia dal glatsch.
  • Interrupziun dal provediment d'electricitad e/u da las colliaziuns da telefon, particularmain en regiuns giu da via.

Cumportament

Infurmaziuns davart il cumportament chattais Vus en las Recumandaziuns da cumportament durant vias glischas

Descripziun da las valurs da mesiraziun e da prognosa

Plievgia che sa transfurma en glatsch: sur 2 mm (quantitad totala da las precipitaziuns che schela sin il funs).

Nivel da privel 5 (fitg grond privel)

I n'è betg pussaivel da far differenziaziuns en cas da quantitads da precipitaziuns pli grondas. En Svizra na datti strusch vias ch'èn cuvertas pli ditg da glatsch viv.

Explicaziuns

Per territoris sur 800 meters sur mar na vegnan publitgads nagins avertiments da vias glischas da glatsch u da naiv.