La Confederaziun infurmescha ed avertescha la populaziun, las medias e las autoritads en cas da privels da la natira smanatschants. Ils posts spezialisads federals per privels da la natira sa coordineschan en il Comité directiv Intervenziun privels da la natira LAINAT e collavuran stretgamain en tut las situaziuns.
Il secretariat LAINAT promova la prevenziun en cas d'eveniments da la natira extraordinaris e coordinescha las incumbensas che resultan dal Conclus dal Cussegl federal davart la "Optimaziun da l'alarm e da l'avertiment" (OWARNA). En il LAINAT èn s'unids l'Uffizi federal d'ambient UFAM, l'Uffizi federal per meteorologia e climatologia MeteoSvizra, l'Uffizi federal da protecziun da la populaziun UFPP, l'Institut federal per la perscrutaziun da guaud, naiv e cuntrada WSL cun il WSL Institut per la perscrutaziun da la naiv e da las lavinas SLF, il Servetsch seismologic svizzer SSS e l'Uffizi federal da la topografia swisstopo. Al secretariat LAINAT è affilià il secretariat da la Plattafurma d'infurmaziun cuminaivla davart privels da la natira (GIN).
Sco servetsch naziunal per l'aura ed il clima garantescha MeteoSvizra il provediment da basa cun infurmaziuns davart l'aura ed il clima en Svizra e presta uschia ina contribuziun impurtanta per la societad, la politica, l'economia e la scienza. Staziuns da mesiraziun terrestras, radars da l'aura, satellits, radiosondas ed auters instruments registreschan l'aura. MeteoSvizra surveglia l'aura, fa prognosas da l'aura ed avertescha las autoritads e la populaziun da malauras. Ultra da quai analisescha MeteoSvizra datas che permettan da trair conclusiuns davart la midada dal clima e davart eveniments extrems da l'aura e che servan sco basa per scenaris davart il svilup dal clima en Svizra.
L'Uffizi federal d'ambient (UFAM) ha l'incumbensa da garantir l'utilisaziun duraivla da las resursas natiralas sco il terren, l'aua, l'aria ed il guaud. El è responsabel per la protecziun cunter privels da la natira, protegia l'ambient e la sanadad dals umans da grevezzas excessivas, procura per il mantegniment da la biodiversitad ed è cumpetent per la politica d'ambient internaziunala. En il sectur dals privels da la natira è il UFAM responsabel per far prognosas idrologicas sco er per avertir la populaziun davart auas grondas, davart moviments da massa, setgira e davart il privel d'incendis da guaud.
Il Servetsch seismologic svizzer (SSS) da la Scola politecnica federala Turitg è il post spezialisà federal per terratrembels. Per incumbensa da la Confederaziun surveglia il SSS l'activitad seismica en Svizra sco er a l'exteriur vischin e giuditgescha la periclitaziun tras terratrembels en Svizra. En cas d'in terratrembel infurmescha il SSS la publicitad, las autoritads e las medias davart il lieu, la fermezza e las consequenzas pussaivlas.
Il SLF perscrutescha en moda orientada a las soluziuns davart privels da la natira, sistems ecologics alpins sco er naiv e glatsch en in mund che sa mida e porscha differents servetschs. El sviluppa concepts, strategias e mesiras concretas per la protecziun da la populaziun cunter privels da la natira e per il tractament da ristgas, ma er soluziuns persistentas per problems socialmain relevants – ensemen cun ses partenaris da la scienza e da la societad.
Il SLF giuditgescha il privel da lavinas en las Alps svizras e publitgescha durant l'enviern mintga di il bulletin da lavinas. Il Servetsch operaziunal idrologic nival (OSHD) dal SLF analisescha cuntinuadamain la repartiziun da las resursas d'aua che derivan da la marschauna e sustegna il UFAM tar l'avertiment en cas d'auas grondas. Il SLF appartegna a l'Institut federal da perscrutaziun WSL ed uschia al sectur da las Scolas politecnicas federalas.