En Svizra datti cunzunt incendis da guaud sin pitschnas surfatschas. Periclitads èn principalmain il Vallais, il Grischun, il Tessin sco er las vals da favugn. Umans èn darar periclitads tras incendis da guaud, perquai che la legislaziun svizra na permetta nagins edifizis d’abitar en il guaud.

La ristga d’incendis da guaud designescha la probabilitad, cun la quala i po resultar in incendi da guaud. La ristga d’incendis da guaud po s’augmentar p.ex. tras activitads da temp liber, uschia ch’igl è necessari da prender mesiras gia en cas d’in pitschen privel d’incendis da guaud.

Nivel da privel 1 (pitschen u nagin privel) vul dir

Fieus da fund resp. fieus superfizials èn plitost rars. Las tschimas n’èn betg pertutgadas. En cas d’in chametg è la probabilitad d’in incendi pitschna.

Recumandaziuns da cumportament

• Betg bittar davent en il guaud u en la vischinanza dal guaud cigarettas u zulprins e chaussas sumegliantas che ardan u che n’èn betg stizzads dal tuttafatg.
• Observar permanentamain il fieu e stizzar immediatamain las sbrinzlas. Avant che bandunar il lieu adina stizzar dal tuttafatg la burnida, en il cas ideal cun aua e sablun/terra.

Infurmaziuns supplementaras

• Sveltezza da la derasaziun: en general plauna.

Nivel da privel 2 (privel moderà) vul dir

Fieus da fund resp. fieus superfizials èn pussaivels. Las tschimas èn plitost darar pertutgadas. En cas d’in chametg è in incendi pussaivel.

Recumandaziuns da cumportament

• Betg bittar davent en il guaud u en la vischinanza dal guaud cigarettas u zulprins e chaussas sumegliantas che ardan u che n’èn betg stizzads dal tuttafatg.
• Observar permanentamain il fieu e stizzar immediatamain las sbrinzlas. Avant che bandunar il lieu adina stizzar dal tuttafatg la burnida, en il cas ideal cun aua e sablun/terra.

Infurmaziuns supplementaras

• Sveltezza da la derasaziun: plauna fin mesauna.

Nivel da privel 3 (privel considerabel) vul dir

Fieus da fund resp. fieus superfizials èn pussaivels. Er singulas tschimas pon esser pertutgadas. En cas d’in chametg è in incendi probabel.

Recumandaziuns da cumportament

• Observar permanentamain il fieu e stizzar immediatamain las sbrinzlas. Avant che bandunar il lieu adina stizzar dal tuttafatg la burnida, en il cas ideal cun aua e sablun/terra.
• Observar las instrucziuns (scumonds da far fieu) da las autoritads localas.
• Ulteriuras infurmaziuns sut «Cumportament durant in incendi da guaud».

Infurmaziuns supplementaras

• Sveltezza da la derasaziun: gronda en la cuntrada averta, mesauna en il guaud.

Nivel da privel 4 (grond privel) vul dir

Fieus da funs chauds cun derasaziun sin singulas tschimas èn pussaivels. Material ardent che sgola enturn po chaschunar novs incendis. En cas d’in chametg è in incendi fitg probabel.

Recumandaziuns da cumportament

• Betg far fieu en cas da ferm vent.
• Observar las instrucziuns (scumonds da far fieu) da las autoritads localas.
• Ulteriuras infurmaziuns sut «Cumportament durant in incendi da guaud».

Infurmaziuns supplementaras

• Sveltezza da la derasaziun: gronda en la cuntrada averta sco er en il guaud.

Nivel da privel 5 (fitg grond privel) vul dir

Fieus da funs fitg chauds e grondas surfatschas da tschimas che ardan èn pussaivels. Material ardent che sgola enturn po chaschunar novs incendis en grondas distanzas. En cas d’in chametg è in incendi fitg probabel.

Recumandaziuns da cumportament

• Na far nagins fieus en il liber.
• Observar las instrucziuns (scumonds da far fieu) da las autoritads localas.
• Ulteriuras infurmaziuns sut «Cumportament durant in incendi da guaud».

Infurmaziuns supplementaras

Sveltezza da derasaziun: fitg gronda en la cuntrada averta ed en il guaud durant in lung temp.