Lavinas èn massas da naiv che glischnan u crodan giu. Ellas resultan tras instabilitads en la cuverta da naiv e sa distatgan per il solit en il terren spundiv. En cas da navaglias intensivas, da ferm vent u d’in augment marcant da la temperatura vegnan lavinas giu pli tgunsch. Lavinas pon vegnir giu spontanamain (vul dir senza l’influenza d’umans) u vegnir messas en moviment da persunas. 90 pertschient da tut las victimas da lavinas han distatgà sez lur lavina. En abitadis e sin vias da traffic procuran las autoritads localas per la segirezza da la populaziun. Persunas che fan sport d’enviern e che sa movan ordaifer las pistas, las loipas e las sendas da viandar avertas e.u.v., èn sezzas responsablas per lur segirezza.

Nivel da privel 1 (pitschen u nagin privel) vul dir

Lavinas pon sa distatgar mo en singuls cas sin spundas extremamain stippas (pli stip che 40°). Nagins segns d’alarm n’èn da constatar.

Recumandaziuns da cumportament

• Ir cun skis in ad in sin spundas extremamain stippas.
• Resguardar il privel da crudar giu.

Infurmaziuns supplementaras

• Il nivel da privel 1 vegn prognostitgà per circa 20 % da l’enviern.
• Quest nivel da privel chaschuna var 5 % da tut ils morts tras lavinas.

Nivel da privel 2 (privel moderà) vul dir

Lavinas pon vegnir distatgadas tras persunas sin spundas fitg stippas (pli stip che 35°). En singuls cas pon sa manifestar segns d’alarm. Cun fitg grondas lavinas spontanas n’èsi betg da far quint.

Recumandaziuns da cumportament

• Tscherner cun precauziun la ruta.
• Ir cun skis in ad in sin spundas fitg stippas.
• Speziala precauziun tar ina structura da la cuverta da naiv disfavuraivla (problem cun naiv veglia).

Infurmaziuns supplementaras

• Il nivel da privel 2 vegn prognostitgà per circa 50 % da l’enviern.
• Quest nivel da privel chaschuna var 30 % da tut ils morts tras lavinas.

Nivel da privel 3 (privel considerabel) vul dir

Situaziuns cun il nivel da privel 3 èn las pli criticas per sportists d’enviern.

Lavinas pon sa distatgar facilmain sin spundas stippas (pli stip che 30°). Segns d’alarm sco ramurs surdas e sfessas èn tipics, ma betg adina avant maun. Lavinas spontanas e distatgaments a distanza èn pussaivels.

Recumandaziuns da cumportament

• Igl è indispensabel da tscherner la ruta optimala e d’applitgar mesiras che reduceschan la ristga.
• Evitar las spundas fitg stippas da las autezzas e dals lieus exponids inditgads en il bulletin da lavinas.
• A persunas senza experientscha vegni recumandà da restar sin las descensiuns e rutas avertas.

Infurmaziuns supplementaras

• Il nivel da privel 3 chaschuna var 50 % da tut ils morts tras lavinas.
• El vegn prognostitgà per circa 30 % da l’enviern.
• En singuls cas pon esser periclitads trajects da vias da traffic (vias, pistas da skis, sendas da viandar e.u.v.). Resguardar serradas.

Nivel da privel 4 (grond privel) vul dir

La situaziun da lavinas è fitg critica. Sin bleras spundas stippas pon lavinas sa distatgar facilmain. Segns d’alarm e distatgaments a distanza èn frequents ed ins sto savens far quint cun fitg grondas lavinas. Vias da traffic (vias, pistas da skis, sendas da viandar e.u.v.) pon esser periclitadas.

Recumandaziuns da cumportament

• Resguardar secturs finals da fitg grondas lavinas.
• Persunas senza experientscha ston restar sin las descensiuns e rutas avertas.
• Evitar dal tuttafatg spundas stippas (pli stip che 30°).
• Resguardar serradas.

Infurmaziuns supplementaras

• Il nivel da privel 4 chaschuna var 10 % da tut ils morts tras lavinas.
• Quest nivel da privel vegn prognostitgà per paucs dis da l’enviern.

Nivel da privel 5 (fitg grond privel) vul dir

La situaziun da lavinas è extraordinaria. Ins sto far quint cun bleras fitg grondas ed extremamain grondas lavinas spontanas. Quellas pon cuntanscher e periclitar vias ed abitadis en la val.

Recumandaziuns da cumportament

• Desister da far sport da naiv ordaifer las descensiuns e rutas avertas.
• Suandar las mesiras da las autoritads.

Infurmaziuns supplementaras

• Il nivel da privel 5 chaschuna var 1 % da tut ils morts tras lavinas.
• Ina tala situaziun extraordinaria da lavinas vegn avant mo fitg darar.

Nivels intermediars

Sch’igl exista in privel da lavinas sitgas classifitgescha il WSL ils nivels da privel europeics a partir dal nivel 2 (moderà) cun nivels intermediars. Quels inditgeschan, sch’il privel vegn stimà plitost en il sectur pli bass (-), circa en il sectur mesaun (=) ubain en il sectur pli aut (+) dal nivel da privel.