Per che las autoritads ed ils secturs pertutgads possian sa preparar a temp per ina proxima setgira, vegnan publitgads avertiments uffizials, tuttina sco per auters privels da la natira. Quests avertiments sa basan sin il giudicament emnil da la situaziun actuala tras experts e sin la prognosa da l’index da setgira cumbinà (CDI) (tudestg) per mintga regiun. Auter ch’il CDI che vegn calculà automaticamain, cuntegnan ils avertiments ina interpretaziun da la tendenza e resguardan la malsegirezza da la prognosa.

En cas d’ina setgira vegnan publitgads ils suandants nivels da privel per mintga regiun. Els sa basan sin la scala da privel tenor l’Ordinaziun davart la protecziun da la populaziun (art. 24 OPPop) (tudestg):

Nivel da privel 1 (pitschen u nagin privel) vul dir

I n’exista nagin privel resp. il privel è pitschen, ch’i sa sviluppia ina setgira che dura pli ditg (pliras emnas). Mesiras periodicas annualas da spargnar aua u mesiras da spargnar aua ordinadas localmain n’èn betg exclusas.

Recumandaziuns da cumportament

In cumportament spezial n’è betg necessari.

Infurmaziuns supplementaras

Per pliras valurs (precipitaziuns, deflussiun ed umiditad dal terren) na mussa l’index da setgira cumbinà per las proximas emnas nagina divergenza signifitganta da la media da blers onns.

Nivel da privel 2 (privel moderà) vul dir

I dat indizis per ina perioda da setgira pli lunga (da pliras emnas). Restricziuns d’utilisar l’aua (p.ex. scumonds da prelevar aua) èn localmain resp. regiunalmain pussaivlas. Il privel d’incendis da guaud po esser pli grond. Ulteriuras infurmaziuns sut «Setgira e consequenzas – Plattafurma naziunala da setgira».

Recumandaziuns da cumportament

• Spargnar aua.
• S’infurmar davart eventualas restricziuns d’utilisar aua.
• S’infurmar sin www.trockenheit.ch.
• Ulteriuras infurmaziuns sut «Cumportament durant ina perioda da setgira» (tudestg).

Infurmaziuns supplementaras

L’index da setgira cumbinà (tudestg) mussa per las proximas emnas per pliras valurs (precipitaziuns, deflussiun ed umiditad dal terren) ina divergenza considerabla da la media da blers onns.

Nivel da privel 3 (privel considerabel) vul dir

Avertiments da setgira vegnan publitgads mo per ils nivels da privel 2 e 4. En cas da setgira na vegn il nivel da privel 3 betg utilisà. Per la vasta populaziun na fiss ina differenza tar il nivel 2 numnadamain betg visibla.

Nivel da privel 4 (grond privel) vul dir

I dat indizis per ina setgira cleramain pli gronda. Restricziuns d’utilisar l’aua (p.ex. serrar giu bigls, scumond da bagnar l’iert u da lavar l’auto) èn probablas localmain resp. regiunalmain. Il privel d’incendis da guaud po esser bler pli grond. Ulteriuras infurmaziuns sut «Setgira e consequenzas – Plattafurma naziunala da setgira».

Recumandaziuns da cumportament

• Observar las instrucziuns da las autoritads areguard l’utilisaziun da l’aua.
• Spargnar aua.
• Observar las instrucziuns areguard il privel d’incendis da guaud.
• Ulteriuras infurmaziuns sut «Cumportament durant ina perioda da setgira» (tudestg).

Infurmaziuns supplementaras

Per pliras valurs (precipitaziuns, deflussiun ed umiditad dal terren) mussa l’index da setgira cumbinà per las proximas emnas ina divergenza extrema e rara da la media da blers onns.

Nivel da privel 5 (fitg grond privel) vul dir

Avertiments da setgira vegnan publitgads mo per ils nivels da privel 2 e 4. En cas da setgira na vegn il nivel da privel 5 betg utilisà. Per la vasta populaziun na fiss ina differenza tar il nivel 4 numnadamain betg visibla.