Ils posts spezialisads federals per privels da la natira surveglian cuntinuadamain la situaziun da privels da la natira ed averteschan las autoritads e la populaziun. En cas da gronds e fitg gronds privels da la natira èn ils avertiments suttamess ad in'obligaziun da vegnir derasads. En quest cas vegnan els transmess dals emetturs da radio publics e privats sco "avertiments da la Confederaziun".
Differents posts spezialisads federals surveglian cuntinuadamain la situaziun da privels da la natira ed èn responsabels per emetter avertiments correspundents en cas da privels smanatschants. Las cumpetenzas èn regladas sco suonda:
Ils singuls posts spezialisads coordineschan lur avertiments ed utiliseschan ina scala da tschintg nivels per tut ils privels. Sch'in eveniment pertutga plirs posts spezialisads, vegnan publitgads avertiments cuminaivels che sa basan sin in giudicament general da la situaziun da privel (princip da la "vusch uffiziala unica"). Las coordinaziuns tecnicas tranter ils posts spezialisads federals per privels da la natira han lieu en il Stab spezialisà Privels da la natira.
En spezial suenter las auas grondas da l'onn 2005 èsi vegnì pretendì che la populaziun vegnia infurmada meglier ed en moda pli activa davart avertiments da privels da la natira dals servetschs federals. Per tscherts avertiments è perquai vegnida introducida in'obligaziun da derasaziun che vala per ils programs da radio e televisiun dad SRF / RTS / RSI sco er per tut ils emetturs da radio e televisiun locals concessiunads cun ina incarica da prestaziun, uschenavant che lur territori da diffusiun è pertutgà. Uschia pon ils posts spezialisads responsabels declerar che avertiments da privels da la natira dals nivels 4 e 5 ("grond privel" resp. "fitg grond privel") stoppian vegnir derasads, sch'els èn da l'avis che quai saja necessari. En in tal cas vegn l'avertiment emess al radio ed a la televisiun en il territori pertutgà tenor process definids e cun caracteristicas acusticas ed opticas unitaras sco "avertiment da la Confederaziun".
Sco post central procura la Centrala naziunala d'alarm CENAL tar l'Uffizi federal da protecziun da la populaziun UFPP ch'ils avertiments dals posts spezialisads vegnian transmess svelt, segir ed en moda coordinada a las medias ch'èn obligadas da derasar ils avertiments. La CENAL procura plinavant ch'ils avertiments a la populaziun vegnian coordinads areguard il cuntegn ed il temp cun ils avertiments a las autoritads (servetschs federals / chantuns).