Ils nivels da privel sa refereschan a l’intensitad d’in terratrembel en ina tscherta regiun d’avertiment.

Sin ina scala da 12 stgalims descriva l’intensitad las consequenzas d’in terratrembel per ils umans e per ils edifizis en in tschert lieu. La pli gronda intensitad ha per regla lieu damanaivel da l’epicenter e sa reducescha, pli lunsch davent ch’ins s’allontanescha da l’epicenter. Il Servetsch seismologic svizzer da la SPF Turitg stima per mintga regiun d’avertiment l’intensitad en il center ed attribuescha sin basa da quai in tschert nivel da privel a questa regiun.

L’intensitad n’è betg il medem sco la magnituda. La magnituda descriva l’energia che vegn generada durant in terratrembel respectivamain sia fermezza. In terratrembel ha mintgamai ina magnituda e per il solit pliras valurs d’intensitad.

Nagin stgalim da privel signifitga, ch’i nʼha betg dà ils ultims dus dis in terratrembel cun ina magnituda da 2,5 u dapli en la regiun d’avertiment selecziunada.

Nivel da privel 1 (pitschen u nagin privel) vul dir

Il terratrembel han ins eventualmain sentì ed è vegnì percepì da paucas persunas. Betg da far quint cun donns vi d’edifizis.

Recumandaziuns da cumportament

• Mesiras specificas n’èn betg necessarias.
• Da princip vala: Esser preparà per terratrembels.
• Ulteriuras infurmaziuns sut «Cumportament durant in terratrembel».

Infurmaziuns supplementaras

Quests effects correspundan ad ina intensitad da III. Ina tala intensitad po vegnir cuntanschida en cas da terratrembels cun ina magnituda a partir da circa 2,5.

Nivel da privel 2 (privel moderà) vul dir

Il terratrembel han ins sentì lunsch enturn. En cas singuls han ins percepì quel en il liber, en edifizis l’han bleras persunas sentì. Cun donns vi d’edifizis n’èsi per regla betg da far quint.

Recumandaziuns da cumportament

• Far quint cun ulteriurs terratrembels
• En cas d’ulteriurs terratrembels ir en segirezza, p.ex. sut ina maisa stabila.
• Ulteriuras infurmaziuns sut «Cumportament durant in terratrembel».

Infurmaziuns supplementaras

Quests effects correspundan ad ina intensitad da IV. Ina tala intensitad po vegnir cuntanschida en cas da terratrembels cun ina magnituda a partir da circa 3,5.

Nivel da privel 3 (privel considerabel) vul dir

Il terratrembel han ins sentì lunsch enturn, persunas han eventualmain tschiffà tema. I po dar donns pli pitschens vi d’edifizis pli debels. A l’intern dals edifizis poi dar donns tras objects che crodan giu.

Recumandaziuns da cumportament

• Far quint cun ulteriurs, per part ferms terratrembels.
• En cas d’ulteriurs terratrembels ir en segirezza, p.ex. sut ina maisa stabila.
• Igl è da controllar, sche edifizis debels han subì donns.
• Restar infurmà sut www.seismo.ethz.ch.

Infurmaziuns supplementaras

Quests effects correspundan ad ina intensitad da V u VI. Talas intensitads pon vegnir cuntanschidas en cas da terratrembels cun ina magnituda a partir da circa 4.

Nivel da privel 4 (grond privel) vul dir

Il terratrembel han ins sentì fermamain, bleras persunas han tschiffà tema. A l’intern dals edifizis hai probablamain dà donns tras objects crudads giu. Igl è pussaivel ch’igl ha dà donns vi d’edifizis, sco sfessas en la liadira, sfessas en ils mirs u paraids da trapart sballunadas.

Recumandaziuns da cumportament

• Far quint cun ulteriurs, per part ferms terratrembels.
• En cas d’ulteriurs terratrembels ir en segirezza, p.ex. sut ina maisa stabila.
• Bandunar edifizis cun donns pli gronds. Attenziun d’objects che crodan giu.
• Suandar las instrucziuns da las forzas d’acziun.
• Restar infurmà sut www.seismo.ethz.ch.

Infurmaziuns supplementaras

Quests effects correspundan ad ina intensitad da VII. Ina tala intensitad po vegnir cuntanschida en cas da terratrembels cun ina magnituda a partir da circa 4,7.

Nivel da privel 5 (fitg grond privel) vul dir

Il terratrembel han ins sentì fermamain. Bleras persunas han tschiffà tema e pers l’equiliber. Igl è da far quint cun grevs donns vi d’edifizis, er vi d’edifizis solids, ed ils edifizis debels pon sballunar.

Recumandaziuns da cumportament

• Far quint cun ulteriurs, ferms terratrembels.
• En cas d’ulteriurs terratrembels ir en segirezza, p.ex. sut ina maisa stabila.
• Guardar, sche l’edifizi ha donns.
• Bandunar edifizis cun donns pli gronds. Attenziun d’objects che crodan giu.
• Suandar las instrucziuns da las forzas d’acziun.
• Restar infurmà sut www.seismo.ethz.ch.

Infurmaziuns supplementaras

Quests effects correspundan ad ina intensitad dad VIII u pli auta. Ina tala intensitad po vegnir cuntanschida en cas da terratrembels cun ina magnituda a partir da circa 5,4.