Per regla pon las meteorologas ed ils meteorologs prognostitgar ina pressiun bassa da stemprà. En il temp che resta èsi impurtant da prender tschertas mesiras preventivas vi da la chasa, sin il balcun ed en l'iert. Er sch'i vegnan mo prognostitgads vents d'ina fermezza moderada, ston ins adina quintar localmain cun bufs ferms.
Recumandaziuns da cumportament avant vents ferms
Las consequenzas pussaivlas ed ils nivels da privel da vent chattais Vus qua.
Recumandaziuns da cumportament avant vents ferms:
Observar il svilup local da l'aura.
Resguardar las annunzias push da l'app da MeteoSvizra colliaziun externa.
Resguardar ils alarms da stemprads sin ils lais.
Securisar las plazzas da construcziun e las plazzas d’attraccada da bastiments u bâteaux.
Fixar objects libers enturn la chasa, sin il balcun u en l'iert u metter quels en in lieu protegì (vaschs da flurs, mobiglias d'iert e.u.v.).
Laschar si las storas da sulegl, serrar las fanestras e las portas.
Betg parcar l'auto sut in bostg.
Laschar controllar mintga onn l'edifizi (fixaziun da las antennas, dals implants solars e.u.v., stabilitad da tetgs, da penslas e da fatschadas).
Recumandaziuns da cumportament durant vents ferms
Stemprads tiran per part cun fitg grondas sveltezzas e cun bufs tras il pajais. Els pon strair davent objects, distatgar quadrels dals tetgs, terrar bostga e furmar undas grondas sin ils lais. En cas da vents fitg ferms na duess ins perquai sche pussaivel betg sa trategnair al liber.
Recumandaziuns da cumportament durant vents ferms:
Observar il svilup local da l'aura.
Resguardar las annunzias push da l'app da MeteoSvizra colliaziun externa.
Resguardar ils alarms da stemprads sin ils lais.
Tegnair distanza da las rivas da lais.
Tegnair distanza da guauds, d'urs da guaud, da bostga exponida e da gruppas da bostga.
Betg charrar sin vias da guaud u tras aleas da bostga.
Tegnair distanza da lieus exponids sco tetgs, penslas u nas da grips.
Far attenziun d'objects che crodan giu (quadrels dals tetgs, roms, conducts electrics e.u.v.).
Vetg reparar donns vi d'edifizis ed infrastructuras durant il stemprà (p.ex. quadrels crudads giu dals tetgs), mabain spetgar fin ch'il stemprà è tschessà.
En mintga cas suandar las instrucziuns da las autoritads.
Recumandaziuns da cumportament suenter vents ferms
Cur ch'il vent ed il stemprà tschessan, è il privel direct bain passà, ma savens restan enavos donns pli gronds vi da l'infrastructura. Bostga cupitgada u pitgas electricas terradas pon impedir il traffic sin via e sin la viafier anc durant plirs dis. En il traffic sin via ed al liber ston ins perquai er vinavant esser precaut. Ussa vali da reparar ils donns vi da la chasa ed en l'iert e da far urden. Suenter in stemprà fitg ferm vegni supplementarmain recumandà da laschar controllar, sch'il stemprà ha chaschunà donns vi da l'edifizi.
Recumandaziuns da cumportament suenter vents ferms:
Observar il svilup local da l'aura.
Controllar, sch'igl ha dà donns da stemprà vi da la chasa, vi da l'abitaziun, vi dal balcun e vi da l'iert.
Annunziar immediatamain ils donns a l'assicuranza d'edifizis e laschar reparar ils donns.
Controllar il dumber da bostga enturn la chasa ed en l'iert e laschar tagliar roms exponids.
Controllar la segirezza da las plazzas da construcziun.