Inhaltsbereich

Recumandaziuns da cumportament navaglias

Recumandaziuns da cumportament avant navaglias

  • Betg adina na sa laschan navaglias prognostitgar exactamain. Uschia poi naiver en consequenza d'ina sbassada andetga da la temperatura u nunspetgadamain sur notg. Durant ils mais d'enviern duess ins perquai adina esser preparà per naiv, en spezial en il traffic sin via. En ils territoris da blera naiv duessan ils tetgs da las chasas esser concepids per ina chargia da naiv correspundenta.

    Las consequenzas pussaivlas ed ils nivels da privel da navaglias chattais Vus qua.

    Recumandaziuns da cumportament avant navaglias:

  • Observar il svilup local da l'aura.

  • Resguardar las annunzias push da l'app da MeteoSvizra.

  • Preparar l'auto per l'enviern.

  • Avant e durant il viadi cun auto: s'infurmar davart la situaziun da traffic.

  • En las Alps: Sche grondas navaglias èn annunziadas, bandunar baud avunda ils territoris periclitads da lavinas (er edifizis exponids) tenor las instrucziuns da las autoritads, cunquai che quai è savens mo pli pussaivel sut privel da vita, ina giada ch'i naiva.

  • Tadlar radio, telefonar al numer 163 ed observar las instrucziuns dals servetschs d'enviern.

Recumandaziuns da cumportament durant navaglias

  • Navaglias pon impedir fermamain il traffic, en spezial il traffic sin via. Cun l'auto ston ins perquai charrar cun precauziun speziala e mo cun l'equipament d'enviern correspundent. Ma er sco peduna u pedun ston ins far attenziun al liber en cas da navaglias, perquai che roms pudessan rumper giu e bostga pudess cupitgar sut la chargia da la naiv. Per impedir che naiv crodia giu dals tetgs e ch'ils tetgs vegnian donnegiads, duess la naiv vegnir allontanada dals tetgs.

    Recumandaziuns da cumportament en cas da vias glischas

    Recumandaziuns da cumportament durant navaglias:

  • Observar il svilup local da l'aura.

  • Resguardar las annunzias push da l'app da MeteoSvizra.

  • Avant e durant il viadi cun auto: s'infurmar davart la situaziun da traffic (radio, telefon 163) ed observar las instrucziuns dals servetschs d'enviern.

  • Sche pussaivel renunziar a l'auto e viagiar cun ils meds da transport publics.

  • Sche pussaivel tegnair distanza dal guaud e da la bostga (privel che bostga pudess cupitgar u che roms pudessan rumper giu sut la chargia da la naiv).

  • Allontanar la naiv dals tetgs (chasa, pensla, iert d'enviern e.u.v.), ma en mintga cas prender las mesiras da segirezza necessarias per far quai.

  • Attenziun da naiv che croda giu dals tetgs.

  • Resguardar il bulletin quotidian da lavinas e las infurmaziuns supplementaras dal WSL Institut per la perscrutaziun da la naiv e da las lavinas.

  • En mintga cas suandar las instrucziuns da las autoritads.

Recumandaziuns da cumportament suenter navaglias

  • Cur che las navaglias èn passadas, hai eventualmain anc blera naiv sin las vias, sin ils tetgs e sin la bostga. La situaziun da lavinas resta per il solit precara. Durant quest temp vali da resguardar tschertas reglas da cumportament.

    Vus stuais er far quint cun auters privels, en spezial sche la naiv lieua svelt pervia da l'augment da las temperaturas e chaschuna aua gronda en ils flums ed en ils auals.

    Sche Vus abitais en in territori da blera naiv, duessas Vus laschar controllar suenter l'ultima navaglia, sch'il tetg da la chasa è vegnì donnegià, e sche necessari laschar reparar quel per il proxim enviern.

    Plinavant ston vegnir resguardads ils suandants puncts:

  • Observar il svilup local da l'aura.

  • Sche pussaivel renunziar a l'auto e viagiar cun ils meds da transport publics.

  • Sche pussaivel tegnair distanza dal guaud e da la bostga (privel che bostga pudess cupitgar u che roms pudessan rumper giu sut la chargia da la naiv).

  • Allontanar la naiv dals tetgs (chasa, pensla, iert d'enviern e.u.v.), ma en mintga cas prender las mesiras da segirezza necessarias per far quai.

  • Attenziun da naiv che croda giu dals tetgs.

  • Resguardar il bulletin quotidian da lavinas e las infurmaziuns supplementaras dal WSL Institut per la perscrutaziun da la naiv e da las lavinas.

  • En mintga cas suandar las instrucziuns da las autoritads.

Ulteriuras infurmaziuns