Inhaltsbereich

Recumandaziuns da cumportament chalira

Recumandaziuns da cumportament avant ina perioda da chalira

Periodas da chalira èn per regla previsiblas. Sche las temperaturas s'augmentan resp. sche l'umiditad da l'aria è auta, duessan perquai vegnir resguardadas las previsiuns da l'aura sco er las infurmaziuns en las medias. As infurmai plinavant en l'apoteca u tar Vossa media u Voss medi davart las mesiras da cumportament che vegnan recumandadas en spezial en cas da chalira.

Ulteriuras mesiras preventivas:

Preparar avunda aua (sche pussaivel sfradentada).

S'infurmar davart las consequenzas en cas da chalira.

Dar aria a l'edifizi avant l'unda da chalira, spezialmain a bun'ura.

Resguardar las annunzias push da l'app da MeteoSvizra.

Las consequenzas pussaivlas ed ils nivels da privel da chalira chattais Vus qua.

Recumandaziuns da cumportament durant ina perioda da chalira

La chalira po donnegiar la sanadad dals umans ed eventualmain reducir las prestaziuns spiertalas e corporalas.

Quant bain ch'ina persuna cumporta la chalira, dependa er da ses stadi corporal mumentan. Uschia cumportan ins cleramain main bain la chalur, sch'ins ha per exempel in dafraid u malsognas cronicas. En general reageschan dunnas en speranza, uffants pitschens, persunas pli veglias e malsaunas pli fitg sin temperaturas autas.

Mals tipics en consequenza da la chalira pon sa mussar en furma da sturnizi, mal il chau, spussada, malesser, vomitar e.u.v.

Recumandaziuns generalas da cumportament durant ina perioda da chalira:

Sa proteger cunter l'irradiaziun directa dal sulegl (sumbriva, vestgadira, chapè, egliers da sulegl, crema da sulegl e.u.v.) e restrenscher las activitads al liber sin la damaun e la saira.

Evitar sforzs corporals.

Baiver regularmain ed avunda (almain 1,5 liters per di).

Betg baiver alcohol.

Tegnair fraid il corp e l'abitaziun.

Cumpensar la perdita da sal durant u suenter activitads sportivas.

Mangiar chaussas frestgas, fraidas e ligeras.

Nizzegiar la sfradentada durant la notg: dar intensivamain aria als edifizis.

S'infurmar cuntinuadamain sur las medias resp. sur las prognosas da l'aura.

Resguardar las annunzias push da l'app da MeteoSvizra.

Contactar las persunas en il conturn (incl. vischinas e vischins) che appartegnan a la categoria da ristga (en spezial persunas attempadas ch’èn sulettas e che han malsognas cronicas), e guardar ch’i giaja bain cun ellas e ch’ellas possian suandar las recumandaziuns existentas.

En mintga cas suandar las instrucziuns da las autoritads.

Las consequenzas pussaivlas ed ils nivels da privel da chalira chattais Vus qua.

Recumandaziuns da cumportament suenter ina perioda da chalira

La chalira po chaschunar donns, per exempel tras quai che l'agricultura vegn donnegiada visiblamain (setgentada dal terren, furmaziun da sfessas, perditas da racolta e.u.v.). Ultra da quai pon grondas undas da chalira sco quellas dals onns 2003 e 2015 er chaschunar morts.

Suenter ina perioda da chalira duess ins sa schanegiar e plitgunsch evitar prestaziuns sportivas maximalas. Il corp dovra in tschert temp, fin ch'el è puspè s'adattà.

As infurmai plinavant en l'apoteca u tar Voss medi davart las mesiras preventivas che pon vegnir prendidas per esser bain preparà per ina proxima perioda da chalira.

Il privel d'incendis da guaud po esser avant maun er vinavant.