Recumandaziuns da cumportament moviments da massa
Recumandaziuns da cumportament avant moviments da massa
Consultai las documentaziuns davart ils privels, en spezial la charta da privels da Vossa vischnanca. Las chartas da privels mussan, tge abitadis en Svizra ch'èn periclitads da privels da la natira. Blers chantuns publitgeschan lur chartas da privels en l'internet. Ils posts chantunals spezialisads per privels da la natira, las vischnancas ed eventualmain er las forzas d'acziun localas pon dar infurmaziuns davart ils territoris periclitads.
Sche Vus abitais en in territori periclità da sbuvadas, da bovas u da crudada da crappa, èsi impurtant da prender a temp mesiras da prevenziun e da tegnair a disposiziun meds auxiliars:
Per edifizis existents u novs
Construir edifizis novs en mintga cas ordaifer la zona da privel.
Resguardar las instrucziuns da planisaziun per edifizis existents en territoris periclitads.
-
Prender mesiras architectonicas: rinforzar las plattas da fund ed ils mirs exteriurs, proteger permanentamain las averturas sco fanestras e portas. Sclerir dumondas davart las mesiras preventivas cun persunas spezialisadas.
-
Laschar installar conducts d'aua da plievgia.
-
Adattar l'utilisaziun dals locals interns: planisar en il sectur periclità da la vart da la spunda mo chombras per activitads che duran en general mo in curt temp.
-
Adattar l'utilisaziun dals locals externs: metter las plazzas da seser, ils balcuns e.u.v. en il sectur da la paraid exteriura che n'è betg exponì ad ina sbuvada.
Dumandar la vischnanca dal lieu d'abitar e da lavur infurmaziuns davart la planisaziun existenta per cas d'urgenza.
Per il terren enturn in edifizi existent
-
Per stabilisar las spundas periclitadas da sbuvar: emplantar sin questas spundas bostga e chaglias che han ragischs profundas.
-
Allontanar l'aua da plievgia (drenascha da la spunda).
Recumandaziuns da cumportament durant moviments da massa
Durant in moviment da massa duain ins restar calm e resguardar differentas mesiras da cumportament.
Tegnair distanza da spundas periclitadas da sbuvadas, da bovas u da crudada da crappa (consultar la charta da privels).
Betg sa trategnair ordaifer edifizis.
Betg sa trategnair en edifizis pauc robusts (p.ex. remisas, clavads).
-
Tgi che abita en territoris periclitads, sa renda en las localitads situadas da la vart da la val.
En cas d'ina evacuaziun en mintga cas suandar las instrucziuns da las forzas d'acziun al lieu.
-
Restar calm.
Recumandaziuns da cumportament suenter moviments da massa
Sch'igl ha dà ina sbuvada, ina bova u ina crudada da crappa, duess ins resguardar differentas mesiras e recumandaziuns da cumportament:
-
Annunziar il donn a l'assicuranza d'edifizis. Dismetter las parts da l'edifizi, ils indrizs ed ils objects donnegiads pir suenter che l'experta u l'expert d'assicuranzas ha fatg l'inspecziun.
En cas da donns vi d'elements purtants da l'edifizi (pitgas, paraids smatgadas en e.u.v.): laschar controllar la segirezza structurala tras ina inschignera u in inschigner da construcziun.
-
Evaluar las experientschas persunalas fatgas a chaschun da l'eveniment e prender atgnas mesiras. Discutar cun persunas spezialisadas mesiras per evitar donns futurs.