Inhaltsbereich

Recumandaziuns da cumportament urizis

Recumandaziuns da cumportament avant in urizi

  • Perquai ch'ils urizis sa furman savens spontanamain, andetgamain e svelt e cunquai ch'igl è difficil da predir la via ch'els prendan, resta eventualmain mo pauc temp per far preparativas. Perquai èsi da far quint cun precipitaziuns andetgas e fermas (plievgia u granella) sco er cun bufs e cun chametgs.

    Las consequenzas pussaivlas ed ils nivels da privel d'urizis chattais Vus qua.

    Recumandaziuns da cumportament avant in urizi:

  • Observar il svilup local da l'aura.

  • Resguardar las annunzias push da l'app da MeteoSvizra.

  • Desister da turas en muntogna u da spassegiadas en il guaud u en il terren avert.

  • Fixar e proteger plantas da vaschs, parasols, storas da sulegl, sutgas levas da plastic e.u.v. ch'èn al liber (donns da granella e da vent).

  • Sche pussaivel metter l'auto en ina garascha (donns da granella).

  • Proteger plantas sensiblas cunter granella.

  • Distatgar apparats electrics (p.ex. televisiun, computer) da la rait electrica.

Recumandaziuns da cumportament durant in urizi

  • Sch'i chamegia e tuna, è l'urizi savens datiers avunda per periclitar persunas al liber. Pli pauc temp che passa tranter il chametg ed il tun, e pli datiers che l'urizi è.

    Regla generala: Il dumber da secundas tranter il chametg ed il tun dividì cun 3 dat la distanza tar l'urizi.

    Recumandaziuns da cumportament curt avant u durant ina situaziun d'urizi:

  • Observar il svilup local da l'aura.

  • Resguardar las annunzias push da l'app da MeteoSvizra.

  • Tegnair distanza da crests exponids a chametgs, da bostga exponida, da gruppas da bostga, da pitgas u da turs.

  • Tschertgar protecziun: en in edifizi / en l'auto.

  • Sch'ins na chatta nagin'autra protecziun: Ir en la posiziun a garnugl.

  • Evitar auas.

  • Tegnair distanza da trajects inundads, da letgs d'auals e da zonas fitg spundivas.

  • En mintga cas suandar las instrucziuns da las autoritads.

Recumandaziuns da cumportament suenter in urizi

  • Cur che l'urizi è passà, n'exista pli nagin privel direct. Cun mesiras immediatas intenziunadas, sco lavurs da rumida e da nettegiament, pudais Vus ussa impedir ulteriurs donns.

    Resguardai per plaschair plinavant ils suandants puncts:

  • Restar emprim agid u alarmar il clom d'urgenza, sch'insatgi è vegnì blessà.

  • Bandunar edifizis donnegiads.

  • Clamar ils pumpiers, per che quels possian eliminar privels u serrar areals.

  • Betg tutgar cabels ch'èn crudads giu per terra.

  • Attenziun da roms che crodan giu.

  • Attenziun dad auas ch'èn idas suror las rivas.

  • Per evitar donns en l'avegnir vegn recumandà il suandant cumportament resp. proceder:

  • Controllar sch'igl ha dà donns da stemprà vi da la chasa u vi da l'abitaziun

  • Annunziar in eventual donn a l'assicuranza d'edifizis.

  • S'infurmar sin la pagina d'internet da PLANAT davart ulteriuras mesiras preventivas.