Inhaltsbereich

Posts spezialisads federals per privels da la natira

La Confederaziun infurmescha ed avertescha la populaziun, las medias e las autoritads en cas da privels da la natira smanatschants. Ils posts spezialisads federals per privels da la natira sa coordineschan en il Comité directiv Intervenziun privels da la natira LAINAT e collavuran stretgamain en tut las situaziuns.

Comité directiv Intervenziun privels da la natira LAINAT

Il secretariat LAINAT promova la prevenziun en cas d'eveniments da la natira extraordinaris e coordinescha las incumbensas che resultan dal Conclus dal Cussegl federal davart la "Optimaziun da l'alarm e da l'avertiment" (OWARNA). En il LAINAT èn s'unids l'Uffizi federal d'ambient UFAM, l'Uffizi federal per meteorologia e climatologia MeteoSvizra, l'Uffizi federal da protecziun da la populaziun UFPP, l'Institut federal per la perscrutaziun da guaud, naiv e cuntrada WSL cun il WSL Institut per la perscrutaziun da la naiv e da las lavinas SLF, il Servetsch seismologic svizzer SSS e l'Uffizi federal da la topografia swisstopo. Al secretariat LAINAT è affilià il secretariat da la Plattafurma d'infurmaziun cuminaivla davart privels da la natira (GIN).

Uffizi federal da protecziun da la populaziun UFPP

Il UFPP è responsabel sin plaun federal per proteger la populaziun svizra da catastrofas e da situaziuns d'urgenza. En cas da gronds eveniments da la natira maina la Centrala naziunala d'alarm dal UFPP il Center d'annunzias e d'analisa da la situaziun CAAS. Il CAAS rimna infurmaziuns, resumescha quellas e las metta a disposiziun als partenaris da la protecziun da la populaziun.

Uffizi federal per meteorologia e climatologia MeteoSvizra

Sco servetsch naziunal per l'aura ed il clima garantescha MeteoSvizra il provediment da basa cun infurmaziuns davart l'aura ed il clima en Svizra e presta uschia ina contribuziun impurtanta per la societad, la politica, l'economia e la scienza. Staziuns da mesiraziun terrestras, radars da l'aura, satellits, radiosondas ed auters instruments registreschan l'aura. MeteoSvizra surveglia l'aura, fa prognosas da l'aura ed avertescha las autoritads e la populaziun da malauras. Ultra da quai analisescha MeteoSvizra datas che permettan da trair conclusiuns davart la midada dal clima e davart eveniments extrems da l'aura e che servan sco basa per scenaris davart il svilup dal clima en Svizra.

Uffizi federal d'ambient UFAM

L'Uffizi federal d'ambient (UFAM) ha l'incumbensa da garantir l'utilisaziun duraivla da las resursas natiralas sco il terren, l'aua, l'aria ed il guaud. El è responsabel per la protecziun cunter privels da la natira, protegia l'ambient e la sanadad dals umans da grevezzas excessivas, procura per il mantegniment da la biodiversitad ed è cumpetent per la politica d'ambient internaziunala. En il sectur dals privels da la natira è il UFAM responsabel per far prognosas idrologicas sco er per avertir la populaziun davart auas grondas, davart moviments da massa e davart il privel d'incendis da guaud.

 

Servetsch seismologic svizzer SSS

Il Servetsch seismologic svizzer (SSS) da la Scola politecnica federala Turitg è il post spezialisà federal per terratrembels. Per incumbensa da la Confederaziun surveglia il SSS l'activitad seismica en Svizra sco er a l'exteriur vischin e giuditgescha la periclitaziun tras terratrembels en Svizra. En cas d'in terratrembel infurmescha il SSS la publicitad, las autoritads e las medias davart il lieu, la fermezza e las consequenzas pussaivlas.

 
 

WSL Institut per la perscrutaziun da la naiv e da las lavinas SLF

Il SLF è in center interdisciplinar da perscrutaziun e da servetschs per il secturs naiv, lavinas, schelira permanenta e sistems ecologics alpins. El appartegna a l'Institut federal da perscrutaziun WSL ed uschia tar il sectur da las Scolas politecnicas federalas. Il SLF giuditgescha il privel da lavinas en las Alps svizras e publitgescha durant l'enviern mintga di il bulletin da lavinas. Il Servetsch operaziunal idrologic nival (OSHD) dal SLF analisescha cuntinuadamain la repartiziun da las resursas d'aua che derivan da la marschauna e sustegna il UFAM tar l'avertiment en cas d'auas grondas.

 
 
 
 

Uffizi federal da topografia swisstopo

swisstopo mesira la Svizra, relevescha e documentescha la cuntrada ed il sutterren. La paletta da products è vasta: Chartas naziunalas d'auta qualitad e precisiun, models altimetrics e models da la cuntrada, fotografias or da l'aria ed ortofotografias, datas e chartas geologicas u applicaziuns en l'internet sco er per smartphones e per tablets.