Inhaltsbereich

Recumandaziuns da cumportament lavinas

Recumandaziuns da cumportament avant lavinas

  • ras mesiras bain ponderadas pudais Vus As preparar per situaziuns cun in privel da lavinas augmentà. Uschia pudais Vus minimar la ristga che persunas, edifizis u objects vegnan donnegiads.

  • Cun far sport da naiv ordaifer territoris segirads

    Sche Vus essas en gir ordaifer pistas, loipas u sendas da viandar l'enviern segiradas ed avertas, essas Vus sez responsabel per Vossa atgna segirezza. Vus essas exponì al privel da lavinas ed ad auters privels alpins. Vus sezs pudais chaschunar lavinas. Las suandantas mesiras gidan a reducir la ristga d'accidents.

  • S'infurmar davart il privel actual da lavinas (www.slf.ch, App „White Risk“).

  • Metter il detectur da victimas da lavinas sin "emetter", prender cun sai ina sonda da lavinas ed ina pala e savair ir enturn cun quest equipament per cas d'urgenza. Ultra da quai vegn recumandà in airbag da lavinas.

  • Planisar las turas ed adattar il cumportament a la situaziun actuala.

  • Frequentar in curs da lavinas per emprender a planisar turas, a giuditgar la topografia, a valitar il privel da lavinas ed a salvar camaratas e camarats.

  • En cas da dubi restar sin pistas avertas u s'unir cun ina gruppa che vegn manada d'ina guida u d'in guid professiunal.

  • Sin vias da traffic ed en abitadis - avant l'enviern

    As infurmai tar la vischnanca u tar il post spezialisà per privels da la natira da Voss chantun, sche Vus abitais en in edifizi ch'è periclità da lavinas. Sche Vus abitais en ina zona da privel da lavinas cotschna u blaua, As preparai avant l'enviern sco suonda.

  • Enconuscher las funtaunas che infurmeschan davart il privel da lavinas actual e davart las mesiras ordinadas: adressa d'internet e numer da telefon da l'autoritad communala e / u dal servetsch da lavinas local, abunar infurmaziuns per SMS.

  • Procurar per la cuntanschibladad per telefon: communitgar l'agen numer da telefon a la vischnanca / al servetsch da lavinas local.

  • Controllar las pussaivladads per segirar fanestras e portas (barcuns e.u.v.).

  • Endrizzar al plaunterren u al plaun sutterran localitads, nua ch'igl è pussaivel da sa trategnair durant intgins dis.

  • Procurar ch'il contact cun las autoritads saja garantì or da questas localitads (telefon, radio a battarias).

  • Preparar meds per rumir la naiv, lampa da maun e battarias da reserva.

  • Sin vias da traffic ed en abitadis - en cas d'in privel da lavinas acut

  • Suandar ils cumonds da las autoritads, resguardar las serradas.

  • S'infurmar cuntinuadamain davart il svilup actual e davart las mesiras ordinadas (sur internet / radio / infurmaziuns dad SMS / telefon).

  • Serrar ils barcuns da la vart dal munt ed ils barcuns laterals.

  • Betg bandunar l'edifizi, sa trategnair sin il plaun sutterran/sin il plaunterren.

  • Preparar pala da naiv, zappun, lampa da maun e battarias da reserva en chasa.

  • Stizzar fieus averts.

  • Serrar giu apparats electrics che na vegnan betg duvrads.

  • Restar en contact cun la vischnanca, cun il servetsch da lavinas u cun la polizia.

  • Sa preparar per in'eventuala evacuaziun.

  • Sch'ina evacuaziun è necessaria pervia dal privel da lavinas, vegn quella ordinada e realisada tras las autoritads localas. Vus pudais As preparar cun:

  • Preparar vestgadira chauda e buns chalzers d'enviern.

  • Pachetar in pitschen satgados u ina pitschna tastga da viadi cun objects da diever persunals.

  • Preparar las scrittiras impurtantas.

  • Organisar ina pussaivladad d'abitar tar parents/enconuschents ordaifer il territori periclità, nua ch'igl è pussaivel da sa trategnair durant intgins dis.

Recumandaziuns da cumportament durant ina lavina

  • Il dretg cumportament, sch'ina lavina sa distatga, po salvar vitas.

  • Cun far sport da naiv ordaifer territoris segirads

    Persunas tschiffadas d'ina lavina:

  • Empruvar da scappar da la lavina.

  • Laschar ir ils bastuns da skis.

  • Activar l'airbag da lavinas, sche avant maun.

  • Sch'ina fugia or da la lavina n'è betg pussaivla, metter ils mauns davant la fatscha per proteger las vias respiratoricas.

  • Persunas betg tschiffadas:

  • Observar precisamain co e nua che la lavina vegn giu e memorisar il punct, nua ch'ina persuna tschiffada d'ina lavina svanescha.

  • Tegnair quint da l'atgna segirezza, far quint cun lavinas posteriuras.

  • Dar alarm (Rega 1414, sanitad 144, clom d'urgenza internaziunal 112).

  • Cumenzar cun la tschertga da las camaratas e dals camarats.

  • Sin vias da traffic

  • Guardar sin l'atgna segirezza.

  • Charrar davent da la lavina.

  • Betg bandunar l'auto.

  • Fermar ordaifer il sectur da privel.

  • En abitadis

  • Guardar sin l'atgna segirezza.

  • Betg bandunar l'edifizi.

  • Spetgar sin infurmaziuns da las autoritads en localitads dal plaun sutterran u dal plaunterren che sa chattan da la vart da la val.

  • Persunas al liber: tschertgar protecziun a l'intern d'in edifizi u – en direcziun da la lavina – davos in edifizi.

Recumandaziuns da cumportament suenter ina lavina

  • Persunas ch'èn vegnidas sepulidas d'ina lavina sa chattan en in grond privel da mort. Ellas ston vegnir salvadas uschè svelt sco pussaivel.

  • Cun far sport da naiv ordaifer territoris segirads

    Persunas sepulidas:

  • Proteger cun ils mauns las vias respiratoricas.

  • Restar calm.

  • Sa deliberar sez, sche quai è pussaivel.

  • Persunas betg tschiffadas:

  • Guardar sin l'atgna segirezza,  far quint cun lavinas posteriuras.

  • Dar alarm (Rega 1414, sanitad 144, clom d'urgenza internaziunal 112).

  • Salvament da las camaratas e dals camarats: localisar las persunas sepulidas cun l'egl, cun l'ureglia e cun il detectur da victimas da lavinas.

  • Chavar ora uschè svelt sco pussaivel las persunas sepulidas sut la naiv.

  • Dar emprim agid: mesiras d'urgenza che salvan la vita, proteger persunas blessadas cunter sfradentada.

  • Sin vias da traffic

  • Guardar sin l'atgna segirezza, far quint cun lavinas posteriuras.

  • Fermar ordaifer il sectur da privel.

  • Dar alarm (polizia 117, sanitad 144, Rega 1414, clom d'urgenza internaziunal 112).

  • Suandar las instrucziuns da las forzas d'acziun.

  • Sche pussaivel localisar e chavar ora las persunas sepulidas e dar emprim agid.

  • En abitadis

  • Guardar sin l'atgna segirezza, far quint cun lavinas posteriuras, en cas d'edifizis donnegiads: resguardar il privel ch'els sbalunian.

  • Dar alarm (polizia 117, sanitad 144, clom d'urgenza internaziunal 112, servetsch da lavinas local).

  • Suandar las instrucziuns da las forzas d'acziun.

  • Prender mesiras per minimar donns consecutivs (p.ex. tras aua da naiv.

  • Annunziar il donn uschè svelt sco pussaivel a l'assicuranza d'edifizis ed a l'assicuranza da mobigliar.

  • Documentar ils donns sche pussaivel.

  • Dismetter las parts da l'edifizi, ils indrizs ed ils objects donnegiads pir suenter che l'expert d'assicuranzas ha fatg l'inspecziun (excepziun: mesiras immediatas che gidan ad evitar donns consecutivs).