Inhaltsbereich

Recumandaziuns da cumportament incendis da guaud

Recumandaziuns da cumportament avant in incendi da guaud

La ristga d'incendis da guaud designescha la probabilitad, cun la quala i po resultar in incendi da guaud. La ristga d'incendis da guaud po esser augmentada p.ex. tras activitads da temp liber, uschia ch'igl è necessari da prender mesiras gia en cas d'in pitschen privel d'incendis da guaud. Sch'ins fa fieus en il guaud ed ordaifer il guaud, ston ins adina far quai cun la precauziun necessaria – er sch'il privel d'incendis da guaud e pitschen u moderà.

Sche Vus resguardais las suandantas reglas generalas, pudais Vus gidar ad evitar incendis da guaud:

S'infurmar davart la situaziun da privel locala, sch'ins vuless far in fieu al liber.

En mintga cas observar ils scumonds da far fieu!

Resguardar las infurmaziuns en l'internet, al radio ed a la televisiun sco er en las gasettas.

En mintga cas desister da far fieu al liber, sch'i sufla u buffa.

Mai bittar davent cigarettas u zulprins che ardan.

 

Duvrar fuclars fixs per grillar.

 

Observar permanentamain il fieu e stizzar immediatamain eventualas sbrinzlas.

Bandunar fieus da gril / fuclars e lur conturns mo, sch'els èn stizzads dal tuttafatg.

Laschar ir fieus artifizials mo en lieus ch'èn vegnids permess expressivamain da la vischnanca.

Recumandaziuns da cumportament durant in incendi da guaud

Evitai panica ed agi en moda calma e ponderada. Er qua vala il princip: Alarmar – salvar – stizzar! Ma ins sto savair che fieus al liber sa sviluppan en autra moda che incendis en locals serrads. Na veglias perquai betg esser l'eroxa u l'erox, mabain suandai las instrucziuns dals pumpiers locals e dals servetschs forestals.

Per cumbatter incendis da guaud èn responsabels ils pumpiers locals u il servetsch forestal. Els disponan per regla da concepts d'acziun correspundents sco er da basas regiunalas cun material per cumbatter incendis da guaud.

Alarmar

Annunziar immediatamain incendis da guaud als pumpiers (telefon 118).

Infurmar persunas che pudessan esser periclitadas tras l'incendi.

Salvar

Salvar umans ed animals.

Enzugliar en cuvertas u en mantels persunas cun vestgadira che arda (rudlar per il plaun enturn, sfradentar cun aua).

Bandunar il lieu d'incendi.

Stizzar

Na surpigliar naginas ristgas.

Suandar las instrucziuns dals pumpiers locals e dals servetschs forestals.

Recumandaziuns da cumportament suenter in incendi da guaud

Suenter in incendi da guaud èsi impurtant da registrar e d'annunziar ils donns resultads, per che quels possian vegnir eliminads uschè svelt sco pussaivel. En quest connex duain vegnir resguardads ils suandants puncts:

Annunziar immediatamain a l'assicuranza d'edifizis donns vi d'edifizis:

Sur e-mail u cun il formular online.

Per telefon.

Cun in formular.

Proceder correct per registrar ils donns:

Dismetter las parts da l'edifizi, ils indrizs ed ils objects donnegiads pir suenter che l'experta u l'expert d'assicuranzas ha fatg l'inspecziun (excepziun: mesiras immediatas).

Sa procurar offertas per tut las parts da l'edifizi che ston vegnir reparadas u remplazzadas (las assicuranzas d'edifizis sa resalvan il dretg da sa procurar segundas offertas).

examinar cun l'experta u l'expert da donns mesiras pussaivlas per evitar donns futurs (ev. inoltrar ina dumonda da contribuziuns a la Fundaziun per la prevenziun da donns d'edifizis).Unternehmerofferten für alle Gebäudeteile einholen, die repariert oder ersetzt werden müssen (die Gebäudeversicherungen behalten sich vor, Zweitofferten einzuholen).