Inhaltsbereich

Recumandaziuns da cumportament aua grondas

Recumandaziuns da cumportament avant in'aua gronda

Grazia a preparaziuns intenziunadas pon ins impedir victimas e donns. Consultai la charta da privels da Vossa vischnanca. Prendai a temp las mesiras da prevenziun avant in'aua gronda e tegnai a disposiziun meds auxiliars.

Las chartas da privel mussan, tge abitadis en Svizra ch'èn periclitads da privels da la natira sco auas grondas. Blers chantuns publitgeschan lur chartas da privels en l'internet. Ils posts chantunals spezialisads per privels da la natira, las vischnancas ed eventualmain er las forzas d'acziun localas pon per il solit inditgar per mintga parcella, sch'ella tutga tar in territori periclità.

Sche Vus abitais en in territori periclità d'aua gronda, èsi impurtant da prender a temp mesiras da prevenziun e da tegnair a disposiziun meds auxiliars:

Prender mesiras architectonicas vi da l'edifizi: Auzar las foras da glisch, eliminar puncts debels vi da portas, fanestras, averturas da la ventilaziun u conducts electrics che n'èn betg ermetics; construir mirs da protecziun, installar clappas cunter la reflussiun en il conduct d'aua persa (separar il conduct d'aua da tetg dal conduct d'aua malnetta) e.u.v. Sclerir las dumondas davart las mesiras preventivas cun persunas spezialisadas.

Adattar l'utilisaziun dals locals interns, per exempel betg endrizzar locals d'abitar e da lavur en il sectur periclità, montar las installaziuns electricas uschia ch'ellas èn segiras en cas d'inundaziuns e fixar ils tancs d'ieli uschia ch'els na vegnan betg auzads da l'aua.

Magasinar materias privlusas per las auas e materias facilmain inflammablas (chemicalias, ladim, material dad unscher, carburants, colurs, diluents e.u.v.) ordaifer la zona critica.

Tegnair a disposiziun material impurtant, sco per exempel pumpas d'aua, uders, satgs da sablun, folia da plastic, material per stuppar ed isolar, aissas d'armar, aissas normalas, iseglia, guttas, agregat da current d'urgenza, equipament da reserva; controllar la primavaira che tut funcziunia e saja en urden.

S'infurmar, tar tgi e nua ch'ins po retrair satgs da sablun en la vischnanca.

Controllar tar l'assicuranza d'edifizis la garanzia en cas d'in donn elementar.

Discutar en l'atgna chasada, tgi che ha da liquidar tge incaricas en cas d'ina aua gronda (repartiziun da las incumbensas).

Ponderar tge pussaivladads da fugir ch'èn avant maun (ord localitads periclitadas, ord l'atgna chasa, ord da l'abitadi).

Avant in'aua gronda probabla

Persequitar las annunzias actualas da l'aura ed ils avertiments d'aua gronda al radio, a la televisiun ed en l'internet.

Metter en in lieu segir valurs materialas mobilas (auto, rulotta, mobiglias e.u.v.) ed interrumper l'electricitad ed il gas en localitads periclitadas.

Stuppar ed isolar ils conducts, las fanestras e las portas cun il material preparà, senza dentant metter sasez nunnecessariamain en privel.

Procurar per il provediment da persunas dependentas d'agid e porscher agid a vischinas e vischins.

Recumandaziuns da cumportament durant in'aua gronda

Durant in'aua gronda èsi impurtant da sa cumportar adequatamain. Uschia sa laschan proteger persunas e chaussas ed evitar donns. Tge ch'ins po far:

Restar calm, agir en moda ponderada e sche pussaivel sa cumportar en moda independenta. Betg metter sasez nunnecessariamain en privel, bandunar immediatamain il territori periclità.

En cas da privel d'inundaziuns: betg ir en il tschaler u en garaschas sutterranas.

Betg charrar cun l'auto u cun il velo sin vias inundadas.

Tegnair distanza d'auas che han aua gronda. I po dar nunspetgadamain undadas, e rivas lavadas orasut pon sballunar.

Tadlar radio e suandar las instrucziuns da las forzas d'acziun.

Recumandaziuns da cumportament suenter in'aua gronda

Suenter in'aua gronda pon ils donns resultads vegnir minimads ed ulteriurs donns vegnir impedids grazia ad in cumportament adattà. Ils suandants puncts duain vegnir resguardads:

Metter en funcziun il cirquit electric e l'indriz da gas pir, suenter ch'ina spezialista u in spezialist ha controllà las installaziuns ed ils apparats.

Derschentar bain ils conducts d'aua da baiver, far buglir l'aua en cas da dubi.

Cumenzar uschè svelt sco pussaivel cun las lavurs da rumida, da nettegiament e da sientar.

Pumpar ora il tschaler pir, cur ch'il nivel da l'aua sutterrana è pli bass ch'il palantschieu dal tschaler.

Annunziar il donn a l'assicuranza d'edifizis. Dismetter las parts da l'edifizi, ils indrizs ed ils objects donnegiads pir suenter che l'experta u l'expert d'assicuranzas ha fatg l'inspecziun.

Evaluar las atgnas experientschas fatgas a chaschun da las ultimas auas grondas e sche necessari prender atgnas mesiras (vesair "Recumandaziuns da cumportament avant in'aua gronda").

Discutar cun persunas spezialisadas mesiras per evitar donns futurs.