Navigaziun

Logo da la Confederaziun svizra

Links da siglida

tschernì

Cuntegn

Recumandaziuns generalas da cumportament

Aua gronda en il Mattequartier a Berna 2005 (© DDPS)

Aua gronda en il Mattequartier a Berna 2005 (© DDPS)

Eveniments chaschunads da privels da la natira n'èn da princip betg evitabels. Cun mesiras adattadas sa laschan dentant reducir las consequenzas d'eveniments da la natira per ils umans, per ils edifizis e per l'ambient. Contribui Vossa part en chaussa cun in cumportament correct avant, durant e suenter eveniments chaschunads da privels da la natira.

En cas d'in eveniment emprovan las autoritads responsablas da far tut per minimar uschè bain sco pussaivel las consequenzas per ils umans e per las valurs materialas. En quest connex èsi fitg impurtant che la populaziun sa cumportia en moda correcta areguard l'eveniment da la natira e sias consequenzas. En cas d'eveniments chaschunads da privels da la natira, ma er en cas d'autras catastrofas e situaziuns d'urgenza èsi central che mintga singula e singul saja abel da prestar agid a sasez ed agid spontan. Mintgina e mintgin sto perquai esser en cas da proteger sasez fin ad in tschert grad. Differents posts spezialisads han publitgà perquai recumandaziuns da cumportament. Las mesiras da prevenziun avant, las mesiras da dumogn durant e las mesiras da reparaziun suenter eveniments chaschunads da privels da la natira sa differenzieschan tut tenor il tip da privel. Resguardai per plaschair las recumandaziuns da cumportament specificas en cas da  terratrembels,  schelira,  urizis,  chalira,  auas grondas,  lavinas,  moviments da massa,  plievgia,  naiv,  vias glischas,  incendis da guaud e  vent.

Sch’in eveniment ha lieu actualmain, ston en mintga cas vegnir suandadas las instrucziuns da las autoritads localas dal lieu correspundent. Sche Vus essas en ina miseria acuta, telefonai al numer d'urgenza 112. As infurmai sur il radio, sur la televisiun e sur l'internet davart la situaziun da privel actuala e resguardai ils avertiments ed ils signals d'alarm.

Per esser preparà en general sin in eveniment chaschunà da privels da la natira vegnan recumandadas intginas mesiras simplas. Faschai ina planisaziun per cas d'urgenza, controllai mintga onn Voss edifizi e scleri, sche Vossas assicuranzas èn suffizientas. Tips:

  • As infurmai davart il potenzial da privel general en Voss lieu da domicil e da lavur. Las chartas chantunalas da privels infurmeschan en chaussa.
  • Hajas a disposiziun ils numers da telefon d'urgenza ils pli impurtants.
  • Endrizzai ina provisiun d'urgenza (en cas d'eveniments chaschunads da privels da la natira na po il provediment cun victualias e cun aua betg vegnir garantì en mintga cas).
  • Hajas a disposiziun in'apoteca da chasa.
  • Guardai almain ina giada per onn, sche Voss edifizi ha eventuals donns, e controllai las fixaziuns da las antennas, dals implants solars, da las antennas parabolicas, da las storas e.u.v. sco er la stabilitad da penslas e d'avantcorps.
  • Verifitgai, sche l'Assicuranza chantunala d'edifizis paja en Voss chantun ils donns che eveniments elementars chaschunan vi da Voss edifizi.
  • Sche Voss chantun n'ha betg in'assicuranza chantunala d'edifizis, vegni recumandà da far in'assicuranza d'edifizis privata.

Colonna da context