Navigaziun

Logo da la Confederaziun svizra

Links da siglida

tschernì

Cuntegn

Nivels da privel da lavinas

Lavinas èn in dals gronds privels da la natira en il territori alpin. Lavinas pon tutgar chasas, abitadis e vias da traffic, ma er persunas che fan sport d'enviern.

Lavinas èn massas da naiv che glischnan u crodan giu. Ellas resultan tras instabilitads en la cuverta da naiv e sa distatgan per il solit en il terren spundiv. En cas da navaglias intensivas, da ferm vent u d'in augment marcant da la temperatura vegnan lavinas giu pli tgunsch. Lavinas pon vegnir giu spontanamain (vul dir senza l'influenza d'umans) u vegnir messas en moviment da persunas. 90 pertschient da tut las victimas da lavinas han distatgà sez lur lavina. En abitadis e sin vias da traffic procuran las autoritads localas per la segirezza da la populaziun. Persunas che fan sport d'enviern e che sa movan ordaifer las pistas, las loipas e las sendas da viandar avertas e.u.v., èn sezzas responsablas per lur segirezza.

Nivel da privel 5 (fitg grond privel)
Probabilitad da lavinas Ins sto far quint cun bleras lavinas spontanas grondas, savens però er fitg grondas, e quai er sin spundas che n'èn betg fitg stippas.
Vias da traffic ed abitadis Periclitaziun acuta. I ston vegnir prendidas mesiras da segirezza extendidas.
Ordaifer las zonas segiradas Relaziuns fitg nauschas. I vegn recumandà da betg sa trategnair en il territori pertutgà.
Cuverta da naiv La cuverta da naiv è en general pauc cumpacta e per gronda part instabila.
Nivel da privel 4 (grond privel)
Probabilitad da lavinas Lavinas pon sa furmar gia cun pitschnas chargias supplementaras* sin bleras spundas stippas. Tut tenor la cuntrada èsi da far quint cun bleras lavinas mesaunas spontanas, pli savens però er grondas.
Vias da traffic ed abitadis Las parts exponidas èn periclitadas per gronda part. Là vegni recumandà da prender mesiras da segirezza.
Ordaifer las zonas segiradas Relaziuns pauc favuraivlas. Igl è necessari d'avair blera experientscha cun giuditgar la situaziun da lavinas. Limitaziun a spundas betg uschè stippas / resguardar ils intschess da sbuccada da las lavinas.
Cuverta da naiv La cuverta da naiv sin la gronda part da las spundas stippas** è mo pauc cumpacta.
Nivel da privel 3 (privel considerabel)
Probabilitad da lavinas Lavinas pon sa furmar gia cun pitschnas chargias supplementaras*, particularmain sin las spundas stippas inditgadas. Tut tenor la cuntrada èsi pussaivel ch'i sa furman spontanamain lavinas mesaunas, per part però er grondas.
Vias da traffic ed abitadis Tschertas parts exponidas èn periclitadas. Là vegni per part recumandà da prender mesiras da segirezza.
Ordaifer las zonas segiradas Relaziuns che n'èn per part betg bunas. Igl è necessari d'avair experientscha cun giuditgar la situaziun da lavinas. Tegnair distanza sche pussaivel da spundas stippas che han l'exposiziun e che sa chattan en l'autezza inditgadas en il bulletin da lavinas.
Cuverta da naiv La cumpactadad da la cuverta da naiv sin tschertas spundas stippas** è mo modesta fin nauscha.
Nivel da privel 2 (privel moderà)
Probabilitad da lavinas Lavinas pon sa furmar en spezial cun grondas chargias supplementaras*, particularmain sin las spundas stippas inditgadas. Cun lavinas grondas spontanas n'èsi betg da far quint.
Vias da traffic ed abitadis N'èn strusch periclitads da lavinas spontanas.
Ordaifer las zonas segiradas Relaziuns ch'èn per gronda part bunas. Tscherner cun quità la ruta, particularmain sin spundas stippas che han l'exposiziun e che sa chattan en l'autezza inditgadas en il bulletin da lavinas.
Cuverta da naiv La cumpactadad da la cuverta da naiv sin tschertas spundas stippas** è mo modesta, en ils auters lieus en general buna.
Nivel da privel 1 (pitschen privel)
Probabilitad da lavinas En general pon sa furmar lavinas mo cun grondas chargias supplementaras* en singuls lieus ch'èn extremamain spundivs. Spontanamain pon sa furmar mo squatschs e lavinas pitschnas.
Vias da traffic ed abitadis Nagina periclitaziun.
Ordaifer las zonas segiradas En general relaziuns segiras.
Cuverta da naiv La cuverta da naiv è en general bel cumpacta e stabila.
Explicaziuns
* Chargias supplementaras:
  • grondas (p.ex. gruppa da skiunzs senza distanza, vehichel da pistas, siglientar lavinas)
  • pitschnas (p.ex. singul sportist da naiv, persuna che va cun gianellas)
  • spontanas: senza influenza dals umans

** En general descrittas pli detagliadamain en il bulletin da lavinas (p.ex. autezza sur mar, exposiziun, topografia)

  • exposiziun: direcziun geografica, en la quala ina spunda penda
  • exponì: suttamess spezialmain al privel
  • spundas betg uschè stippas: spundas main stippas che circa 30 grads
  • spundas stippas: spundas pli stippas che circa 30 grads
  • lieus extremamain spundivs: pendenza fitg disfavuraivla (per il solit pli stip che circa 40 grads), topografia, vischinanza dal fil, grugliezza dal terren
Las "relaziuns" sa refereschan mo al privel da lavinas. La qualitad da la naiv (naiv da pulvra, naiv marscha, naiv da crusta) u er cundiziuns externas da l'aura (tschajera, stemprà), che cuntegnan eventualmain er in potenzial da privel, vegnan commentadas mo en cas excepziunals en il bulletin da lavinas.
Explicaziuns pli exactas en l'Agid per interpretar il bulletin da lavinas.

Colonna da context