Nivels da privel d'auas grondas
Aua gronda è in stadi, nua che territoris – ch'èn normalmain al sitg – vegnan inundads da l'aua.
Auas grondas (aut nivel da l'aua da lais, auals e flums) ed inundaziuns (auas che van suror las rivas) datti tranter auter, sche lais sco er auals e flums mainan blera aua, sch'i defluescha blera aua suenter ina ferma precipitaziun (plievgia, naiv) e/u suenter ina ferma marschauna u sch'igl arriva dapli aua sutterrana che usità a la surfatscha da la terra (p.ex. funtaunas).
Auas grondas en ils lais duran per il solit pli ditg, han per regla dentant ina forza destructiva main directa che auals che van suror. Auals che van suror han per il solit grondas sveltezzas e pon uschia entaifer curt temp chaschunar donns enorms.
Nivel da privel 1 (pitschen privel u nagin privel)
Consequenzas
Cun impediments dal traffic u cun donns na ston ins normalmain betg far quint.
Cumportament
Sa trategnair en il sectur d'auas è nunproblematic. Ma igl è adina necessari dad esser alert.
Descripziun da las valurs da mesiraziun e da prognosa
- Auas currentas: la deflussiun en l'aua currenta resta sut in eveniment che ha lieu en media ina giada mintga 2 onns. Questas limitas na sa basan betg mo sin datas statisticas, mabain er sin valurs d'experientscha davart il cumportament da las auas
- Lais: il livel dal lai sa chatta sut la sava da privel 1
Nivel da privel 2 (privel moderà)
Consequenzas
Cun talas quantitads d'aua èsi pauc probabel, ma betg d'excluder che l'aua va localmain suror las rivas (l'aua banduna il letg da l'aual) e ch'i dat inundaziuns. En cas excepziunals èsi localmain pussaivel che sutpassadis, garaschas sutterranas e tschalers vegnan inundads. Impediments locals sin vias da traffic exponidas sco er donns locals d'ina dimensiun pli pitschna èn pauc probabels, ma betg d'excluder.
Cumportament
- I po esser privlus da sa trategnair en il sectur d'auas currentas. Sajas precaut e tegnai avunda distanza envers l'aua
- Observai la situaziun e prendai emprimas mesiras da protecziun
- Ulteriuras infurmaziuns chattais Vus sut Cumportament durant in'aua gronda
Descripziun da las valurs da mesiraziun e da prognosa
- Auas currentas: la deflussiun en l'aua currenta sa chatta en il sectur d'in eveniment che ha lieu en media ina giada mintga 2 fin 10 onns (HQ2 – HQ10). Questas limitas na sa basan betg mo sin datas statisticas, mabain er sin valurs d'experientscha davart il cumportament da las auas
- Lais: il livel dal lai sa chatta tranter la media stagiunala maximala ed il cunfin da l'aua gronda, ma sut la sava da privel 2
Nivel da privel 3 (privel considerabel)
Consequenzas
Cun talas quantitads d'aua po l'aua ir en singuls lieus exponids suror las rivas (l'aua banduna il letg da l'aual) ed i po dar inundaziuns en singuls lieus exponids. Localmain èsi probabel che sutpassadis, garaschas sutterranas e tschalers vegnan inundads. Sin vias da traffic exponidas èn probabels impediments locals ed ins sto quintar cun donns locals d'ina dimensiun pli pitschna.
Cumportament
- Igl è privlus da sa trategnair en il sectur d'auas currentas. Tegnai distanza
- Observai la situaziun e prendai las mesiras da protecziun necessarias
- Ulteriuras infurmaziuns chattais Vus en las Recumandaziuns da cumportament en cas d'auas grondas
Descripziun da las valurs da mesiraziun e da prognosa
- Auas currentas: la deflussiun en l'aua currenta sa chatta en il sectur d'in eveniment che ha lieu en media ina giada mintga 10 fin 30 onns (HQ10 – HQ30). Questas limitas na sa basan betg mo sin datas statisticas, mabain er sin valurs d'experientscha davart il cumportament da las auas
- Lais: il livel dal lai sa chatta tranter la media stagiunala maximala ed il cunfin da l'aua gronda, ma sut il cunfin da l'aua gronda
Nivel da privel 4 (grond privel)
Consequenzas
Cun talas quantitads d'aua po l'aua ir pli savens suror las rivas (l'aua banduna il letg da l'aual) ed i po dar pli savens inundaziuns. Edifizis e stabiliments d'infrastructura pon esser pertutgads. Impediments da traffic èn probabels ed ins sto quintar pli savens cun donns.
Cumportament
- Igl è fitg privlus da sa trategnair en il sectur d'auas currentas. Tegnai distanza
- Observai la situaziun e prendai las mesiras da protecziun necessarias
- Ulteriuras infurmaziuns chattais Vus en las Recumandaziuns da cumportament en cas d'auas grondas
Descripziun da las valurs da mesiraziun e da prognosa
- Auas currentas: la deflussiun en l'aua currenta sa chatta en il sectur d'in eveniment che ha lieu en media ina giada mintga 30 fin 100 onns (HQ30 – HQ100). Questas limitas na sa basan betg mo sin datas statisticas, mabain er sin valurs d'experientscha davart il cumportament da las auas
- Lais: il livel dal lai sa chatta tranter il cunfin da l'aua gronda ed il "cunfin da l'aua gronda + 25 cm"
Nivel da privel 5 (fitg grond privel)
Consequenzas
Cun talas quantitads d'aua po l'aua ir en blers lieus suror las rivas (l'aua banduna il letg da l'aual) ed i po dar en blers lieus inundaziuns. Stabiliments d'infrastructura d'impurtanza naziunala, sco per exempel trajects da viafier, ma er vitgs e citads sco er stabiliments d'industria pon esser pertutgads fermamain d'inundaziuns. Per part ston ins far quint cun impediments massivs dal traffic. Ins sto quintar lunsch enturn cun donns per part gronds.
Cumportament
- Igl è fitg privlus da sa trategnair en il sectur d'auas currentas. Tegnai distanza
- Observai la situaziun e prendai las mesiras da protecziun necessarias
- Ulteriuras infurmaziuns chattais Vus en las Recumandaziuns da cumportament en cas d'auas grondas
Descripziun da las valurs da mesiraziun e da prognosa
- Auas currentas: la deflussiun en l'aua currenta sa chatta en il sectur d'in eveniment che ha lieu en media ina giada mintga 100 onns (HQ100). Questas limitas na sa basan betg mo sin datas statisticas, mabain er sin valurs d'experientscha davart il cumportament da las auas
- Lais: il livel dal lai sa chatta sur il sectur dal "cunfin da l'aua gronda + 25 cm"
Explicaziuns
Cunfin da l'aua gronda: livel, a partir dal qual l'aua va suror la riva.
