Nivels da privel da moviments da massa
Sbuvadas
D'ina sbuvada vegni discurrì, sche secturs da la spunda, che consistan da grip e/u da crappa lucca, glischnan giu. Sbuvadas veglias calmas pon puspè daventar activas, e quai plaun a plaun u er andetgamain. Ina furma speziala da sbuvadas èn sbuvaditschs da glitta e glera. Per il solit vegnan els mess en moviment tras plievgia intensiva. La maschaida da crappa lucca e blera aua curra giu svelt e n'è betg chanalisada. Sin spundas stippas pon tals sbuvaditschs perquai esser spezialmain privlus.
Bovas
Cuntrari a sbuvadas sa mussan bovas per il solit en in curs d'aua stip, sco per exempel en in torrent. La lavina da glitta che sa cumpona d'aua, da glera ed eventualmain da bists da bostga po vegnir fitg svelt a val. En la planira sa ferma la bova. Ses material resta enavos là.
Crudada da crappa
Da crudada da crappa vegni discurrì, sche singuls craps u blocs da grips crodan giu. Ils craps ed ils blocs da grips sa ferman per il solit, sch'ina spunda è main stippa che 30 grads. Bostga resp. il guaud pon reducir fermamain la vehemenza dals craps e dals blocs da grips.
Nagins nivels da privel
Moviments da massa, sco per exempel sbuvadas, datti savens en connex cun fermas precipitaziuns e/u auas grondas. Per moviments da massa n'existan nagins nivels da privel spezials. Per plaschair resguardar las infurmaziuns correspundentas sut la rubrica Nivels da privel d'auas grondas.